ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵎⴰⵙⵙ ⵏⵏⵉⵄⵎⴰ ⵎⴰⵢⵢⴰⵔⴰ ⴰⵙⵙ ⵏ ⵓⵙⵉⵏⴰⵙ 21 ⵏⵓⵡⴰⵏⴱⵉⵔ 2023 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ, ⴰⵏⵙⵙⵉⵅⴼ ⵏ ⵜⴳⵔⵓⵎⵎⴰ ⵏ ⵜⵉⴷⴷⵓⴽⵍⴰ ⵏⴳⵔ ⵍⴰⵍⵎⴰⵏ ⴷ ⵍⵎⵖⵔⵉⴱ ⴰⵎⵇⵇⵔⴰⵏ ⴳ ⴱⵓⵏⵜⵙⵜⴰⴳ ⵎⴰⵙⵙ ⴽⴰⵕⵍ ⵍⵓⵍⵢⵓⵙ ⴽⵓⵔⵏⴱⵉⵔⴳ ⵏⵏⴰ ⵉⵙⴽⴰⵔⵏ ⵢⴰⵏ ⵓⵔⵣⴰⴼ ⵉ ⵜⴳⵍⴷⵉⵜ ⵏⵏⵉⴳ ⵏ ⵢⴰⵏ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵏⴼⵔⴰⵔ.
ⴳ ⵜⵣⵡⵉⵔⵉ ⵏ ⵓⵏⵎⵓⵇⵇⴰⵔ ⴰⴷ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⴰⴷⴷⵓⵔ ⵉⵍⵍⴰⵏ ⵖⵔ ⵜⵙⵇⵇⴰⵏ ⵜⵉⵙⵔⵜⴰⵏⵉⵏ ⵏⴳⵔ ⵙⵏⴰⵜ ⵏ ⵜⵎⵉⵣⴰⵔ ⵜⵉⵎⴷⴷⵓⴽⴽⴰⵍ, ⵏⵏⴰ ⴳ ⵜⵍⵍⴰ ⵢⴰⵜ ⵜⴷⵉⵏⴰⵎⵉⵜ ⵜⵓⵎⵏⵉⴳⵜ ⴳ ⵉⵙⴳⴳⵯⴰⵙⵏ ⴰⴷ ⵉⵎⴳⴳⵓⵔⴰ, ⵎⴽⴷⴰ ⵉⵏⵏⴰ ⵎⴰⵙ ⵢⵓⵊⴰⴷ ⵓⵙⵇⵇⵉⵎ ⵃⵎⴰ ⴰⴷ ⵉⵎⵓⵏ ⴷ ⵜⴷⵉⵏⴰⵎⵉⵜ ⴰⴷ ⴰⴼⴰⴷ ⴰⴷ ⵜⴰⵎⵓ ⵜⵓⴳⵜⵜ ⵏ ⵉⴳⵔⴰⵏ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ.
ⵍⵍⵉⴳ ⵉⴼⴽⴰ ⴽⵔⴰ ⵏ ⵉⵙⴼⵔⵓⵜⵏ ⵅⴼ ⵜⵡⵓⵔⵉ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴷ ⵓⴷⵖⴰⵔ ⵏⵏⵙ ⴳ ⵜⵓⵚⴽⴰ ⵜⴰⴷⵙⵜⴰⵔⵜ, ⵉⵙⴰⵡⵍ ⵎⴰⵙⵙ ⴰⵏⵙⵙⵉⵅⴼ ⵅⴼ ⵜⵉⵍⵉⵜ ⵉⴷⵓⵙⵏ ⵏ ⵜⴳⵍⴷⵉⵜ ⴳ ⵜⵓⴳⵜⵜ ⵏ ⵉⴳⵔⴰⵡⵏ ⵉⵙⵔⵜⴰⵏⵏ ⵉⵏⵎⵏⴰⴹⵏ ⴷ ⵜⴳⵔⵓⵎⵎⴰⵡⵉⵏ ⵜⵉⴷⵎⵙⴰⵏⵉⵏ ⵜⵉⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ, ⴷ ⵓⵍⵜⴰⵖ ⴳ ⵜⵙⵏⵜⴰⵢⵉⵏ ⵏⵏⵙⵏ ⵉ ⵓⵙⵔⵓⵙ ⵏ ⵜⴳⵎⵉ ⴷ ⵓⵔⴳⴳⵉⴳ ⴷ ⵓⵙⴷⵓⵙ ⵏ ⵉⵣⴰⵍⵉⵡⵏ ⵉⵛⵛⴰⵔⵏ ⴷ ⵓⵎⵙⴰⵡⴰⵍ ⴷ ⵓⵎⵙⴰⵙⴰ ⵏⴳⵔ ⵉⵎⴰⴷⴰⵏⵏ ⵏⵏⵙⵏ.
ⴳ ⵓⵙⴰⵜⵉ ⴰⴷ, ⴳ ⵎⴰⴷ ⵉⵥⵍⵉⵏ ⵙ ⵜⵎⵙⴰⵔⵜ ⵏ ⵜⵎⵓⵏⵜ ⵜⴰⵎⵓⵔⴰⵏⵜ ⵏ ⵜⴳⵍⴷⵉⵜ, ⵢⵓⵍⵖ ⵎⴰⵙⵙ ⴰⵏⵙⵙⵉⵅⴼ ⴰⴷⴷⴰⴷ ⵏ ⵍⴰⵍⵎⴰⵏ ⵉⵙⴷⵡⴰⵙⵏ ⵉⵙⴷⴷⵉ ⵏ ⵓⵙⵎⵙⴰⵙⴰ ⵏ ⵜⵎⵜⵜⴰ ⵉⵎⵓⵏⵏ, ⴷ ⵜⵙⵏⵜⴰⵢⵜ ⵏ ⵓⵏⴱⴰⴹ ⴰⵏⵉⵎⴰⵏ ⵏⵏⴰ ⵉⵙⵎⵏⵉⴷ ⵍⵎⵖⵔⵉⴱ ⴳ ⵓⵙⴳⴳⵯⴰⵙ ⵏ 2007 ⵉⴳⴰⵏ ⵢⴰⵜ ⵜⵔⵙⵍⵜ ⵜⴰⵙⵔⵜⴰⵏⵜ ⴷ ⵜⵏⵉⵍⴰⵡⵜ ⵉ ⵓⴼⵙⴰⵢ ⵏ ⵓⵎⵏⵣⴰⵖ ⴰⴷ ⵉⴽⴽⴰⵏ ⵓⴳⴳⴰⵔ ⵏ ⵙⵉⵏ ⵡⴰⴳⵏⴰⵔⵏ.
ⴳ ⵓⵣⵎⵣⵣⵓ ⴰⴷ, ⵉⵙⵏⵖⵎⵙ ⵎⴰⵙⵙ ⴰⵏⵙⵙⵉⵅⴼ ⴰⴽⴰⴱⴰⵕ ⵏ ⵍⴰⵍⵎⴰⵏ ⵙ ⵉⵙⵓⵔⴰⵙ ⵏ ⵜⵏⴼⵔⵓⵜ ⴳ ⵜⵙⴳⴰ ⵏ ⵜⴰⵖⴰⵔⵜ ⴷ ⵜⵏⵣⵔⵓⴼⵜ, ⵏⵏⴰ ⵉⴳⴰⵏ ⴰⵍⵎⵓ ⵉ ⵜⴳⵔⴰⵡⵉⵏ ⵜⵉⵍⴰⴼⵉⵏ ⴷ ⵉⵥⴹⵡⴰⵏ ⵏ ⵜⵣⵡⴰⴳⵜ ⵜⵓⴼⴼⵉⵔⵜ ⴷ ⵓⵙⵖⵏⵣⵉ ⴳ ⵉⵡⴷⴰⵏ, ⴰⵀⴰ ⵉⵙⴷⴷⵉⴷ ⵜⵉⵙⵇⵇⴰⵏ ⵉⴷⵓⵙⵏ ⵏⴳⵔ ⵓⵏⵢⵔ ⵏ ⴱⵓⵍⵉⵥⴰⵕⵢⵓ ⴷ ⵜⴳⵔⴰⵡⵉⵏ ⴰⴷ, ⴷ ⵎⴰⵏⵉⴽ ⵙ ⵉⴳⴰ ⵎⴰⵢⴰ ⴷ ⴰⵙⴷⵉⴷⴷⵉ ⵉ ⵓⵎⵏⵥⴰⵡ ⵏ ⵡⴰⴼⵔⵉⵇⵢⴰ ⴷ ⵓⵕⵓⴱⴱⴰ.
ⵙⴳ ⵜⵙⴳⴰ ⵏⵏⵙ ⵢⵓⵍⵖ ⵓⵏⵙⵙⵉⵅⴼ ⵏ ⵜⴳⵔⵓⵎⵎⴰ ⵏ ⵜⵉⴷⴷⵓⴽⵍⴰ ⵏⴳⵔ ⵍⴰⵍⵎⴰⵏ ⴷ ⵍⵎⵖⵔⵉⴱ ⴰⵎⵇⵇⵔⴰⵏ ⵜⴰⴷⵔⴰⵡⵜ ⵎⵓ ⴳⴳⵓⵜⵏ ⵉⴳⵔⴰⵏ ⵏⴳⵔ ⵍⵎⵖⵔⵉⴱ ⴷ ⵍⴰⵍⵎⴰⵏ, ⵖⵉⴽⵍⵍⵉ ⵉⵙⴰⵡⵍ ⵅⴼ ⵜⵉⵔⴰⵜ ⵏ ⵜⵎⵓⵔⵜ ⵏⵏⵙ ⴰⴷ ⵜⵖⵔⵔⴷ ⵜⵉⵣⵎⵎⴰⵔ ⵃⵎⴰ ⴰⴷ ⵔⵉⵡⵏ ⵉⴳⵔⴰⵏ ⵏⵏⵙ ⴷ ⵓⵙⴷⵓⵙ ⵏ ⵡⵓⵎⵥⵉⵏⵏ ⵏⵏⵙ. ⵢⵉⵍⵉ ⵉⵏⵏⴰ ⵎⴰⵙⵙ ⴽⵓⵔⵏⴱⵉⵔⴳ ⵎⴰⵙ ⵉⴳⴰ ⵍⵎⵖⵔⵉⴱ ⵢⴰⵏ ⵓⵣⵓⵔⵜ ⵉⵕⵡⴰⵏ ⴳ ⵜⵙⴳⴰ ⴳ ⵓⵙⵡⵉⵔ ⵏ ⵓⵔⴳⴳⵉⴳ ⴰⵙⵔⵜⴰⵏ ⴷ ⵓⵎⵔⵙⴰⵍ ⴷ ⵢⴰⵏ ⵓⵎⵛⵛⵔⴽ ⴰⴷⵎⵙⴰⵏ ⴰⵎⵓⴼⴰⵢ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ.
ⵖⵉⴽⵍⵍⵉ ⵉⵏⵏⴰ ⵎⴰⵙⵙ ⴽⵓⵔⵏⴱⵉⵔⴳⵎⴰⵙ ⵜ ⵢⵓⵊⵊⴰ ⵓⵔⵣⴰⴼ ⵏ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⵏ ⵍⴰⵍⵎⴰⵏ ⵉ ⵍⵎⵖⵔⵉⴱ, ⴰⴷ ⵢⴰⵏⵏⴰⵢ ⵜⵓⴳⵜⵜ ⵏ ⵜⵙⴰⵡⵔⵉⵏ ⵏⵏⴰ ⵜⵙⴽⵔ ⵜⴳⵍⴷⵉⵜ ⵙⵍⴰⵡⴰⵏ ⴰⴽⴽⵯ ⴳ ⵢⵉⴳⵔ ⴰⵏⴰⵎⵓⵏ, ⴰⵀⴰ ⵉⵎⵍⴰ ⴰⴽⴰⵎⴷ ⵏ ⵜⵎⵓⵔⵜ ⵏⵏⵙ ⵙ ⵜⵙⴰⵡⵔⵜ ⵏ ⵓⴼⵔⴰⴳ ⴰⵏⴰⵎⵓⵏ ⵏⵏⴰ ⴳ ⵜⵍⵜⵖ ⵜⴳⵍⴷⵉⵜ ⴷ ⵜⵉⵔⴰⵜ ⵏⵏⵙ ⴰⴼⴰⴷ ⴰⴷ ⵜⵙⴱⵖⵔ ⴳ ⵉⵔⵉⵎ ⴰⵎⵖⵔⴰⴱⵉ ⴳ ⵎⴰ ⵉⵣⴷⵉⵏ ⴷ ⵜⵓⴳⵜⵜ ⵏ ⵜⵎⵙⴰⵔⵉⵏ ⴰⵎ ⵜⵣⵡⴰⴳⵜ.
ⵎⴽⴷⴰ ⵙⴷⴷⵉⴷⵏ ⵉⵎⴷⵔⴰⵡⵏ ⵙ ⵙⵉⵏ ⵎⴰⵙ ⵔⴰⴷ ⵉⵣⵣⵓⴳⴰⵣ ⵓⵣⴷⴷⵓⵢ ⵏⴳⵔ ⵜⵎⵔⵙⴰⵍ ⵜⵓⵣⵔⵉⴼⵉⵏ ⵙ ⵙⵏⴰⵜ, ⴰⵀⴰ ⵣⵎⵎⴻⵎⵏ ⵎⴰⵙ ⵜⵏ ⵉⵙⵙⵓⵙⵎ ⵓⵙⵡⵉⵔ ⵏ ⵓⵎⵢⴰⵡⴰⵙ ⵉⵍⵍⴰⵏ ⵏⴳⵔ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴷ ⵜⵎⵔⵙⵍⵜ ⵏ "ⴽⵓⵏⵔⴰⴷ ⴰⴷⵉⵏⴰⵡⵔ" ⴳ ⵜⵓⴳⵜⵜ ⵏ ⵉⴳⵔⴰⵏ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ.